2027 – 2028-ci tədris ili üzrə təhsil proqramlarının yenilənməsi məqsədilə dəyirmi masa müzakirələri keçirilib.
By innoadm
Əmək bazarının dəyişən tələblərinə uyğun peşə hazırlığının formalaşdırılması tədris məzmununun mütəmadi təkmilləşdirilməsini və sahə üzrə praktiki təcrübənin nəzərə alınmasını tələb edir. Bu istiqamətdə peşə təhsilinin müxtəlif səviyyələri üzrə 2027–2028-ci tədris ili üçün nəzərdə tutulan 15 ixtisasın təhsil proqramlarının yenilənməsi məqsədilə dəyirmi masa müzakirələri təşkil olunmuşdur.
6–15 oktyabr tarixlərində keçirilən görüşlərdə işəgötürənlər, sahə ekspertləri və peşə təhsili müəssisələrinin nümayəndələri iştirak etmişlər. Təşəbbüsün əsas məqsədi peşə təhsilinin keyfiyyətinin yüksəldilməsi, tədris prosesinin effektivliyinin artırılması və əmək bazarı üçün rəqabətqabiliyyətli, ixtisaslı kadrların hazırlanmasına töhfə verməkdir.
Dəyirmi masa müzakirələri Geyim və aksessuar dizaynı, Qida və içki məhsulları istehsalının texnologiyası, Telekommunikasiya və rabitə avadanlıqlarının quraşdırıcısı, Səs operatoru, Baramaçı, Elektrik qaz qaynaqçısı, Kimyəvi və bioloji analiz laborantı, Geniş profilli traktorçu-maşinist, təmirçi-çilingər, Əl elektrik qaynaqçısı, İsitmə-soyutma, havalandırma sistemləri və avadanlıqları (HVAC) üzrə montajçı, Qənnadçı, Mexaniki yığma işləri üzrə çilingər, Neft-kimya sənayesinin texnoloji qurğularının operatoru, Təmirçi-çilingər və İnteryerin bədii tərtibatı ixtisaslarını əhatə etmişdir.
Müzakirələr zamanı müxtəlif ixtisaslar üzrə tədris məzmunu, istehsalatda tətbiq olunan müasir yanaşmalar və işəgötürənlərin gözləntiləri nəzərdən keçirilmiş, yeni kurikulumların hazırlanması ilə bağlı fikir mübadiləsi aparılmış və müvafiq təkliflər formalaşdırılmışdır.
Elm və Təhsil Nazirliyinin maliyyə dəstəyi, Peşə Təhsili üzrə Dövlət Agentliyi ilə əməkdaşlıq və İnnoveta MMC-nin təşkilatçılığı çərçivəsində hazırlanan kurikulumlar təhsilalanların müasir tələblərə uyğun bilik və bacarıqlara yiyələnməsinə, nəzəri biliklərin praktikada tətbiqi imkanlarının genişləndirilməsinə və onların gələcək peşə fəaliyyətinə daha yaxşı hazırlanmasına töhfə verəcəkdir.
İNNOVETA təhsil və təlim, məşğulluq və sosial sahələrdə ixtisaslaşmış dinamik və sürətlə inkişaf edən peşəkar konsaltinq şirkətidir.
Keçidlər
İNNOVETA 2022. Bütün hüquqlar qorunur.