“Dual Peşə Təhsilindən real iş həyatına”

“Bəzən böyük arzular kiçik bir mətbəxdə başlayır”.

Tamamın aşpazlığa marağı uşaqlıqdan yaranıb. Hələ məktəb illərində ailəsindəki çətinliklər səbəbindən evdə yemək hazırlamaq məsuliyyəti ona həvalə olunmuşdu. İlk baxışda bu, sadəcə bir ev işi kimi görünürdü. Amma bişirdiyi yeməklərin ailə üzvləri tərəfindən bəyənilməsi onu bu peşəyə daha da həvəsləndirdi.

Zaman keçdikcə yemək bişirmək onun üçün sadəcə bir ev işi yox, sevdiyi məşğuliyyətə və özünü gələcəkdə aşpaz olaraq görmə arzusuna çevrildi. Məktəb illərində müxtəlif maneələrlə qarşılaşsa da, Tamam aşpaz olmaq məqsədindən dönmədi. O, orta məktəbi bitirdikdən sonra bu arzusunun arxasınca Şəki Dövlət Peşə Təhsil Mərkəzinin dual peşə təhsili üzrə “Aşpaz” ixtisasına müraciət edir. Bu peşəyə qəbul olunur və burada həm nəzəri biliklər qazanır, həm də real iş mühitində özünü sınamaq imkanı əldə edir. Tamam, tədrisin nəzəri hissəsini peşə təhsil mərkəzində davam edərkən paralel şəkildə, təcrübə hissəsini də Şəkidə aparıcı müəssisələrdən olan “Şəki Park” istirahət mərkəzində keçdi. Təcrübənin ilk günlərindən onun məsuliyyəti, çalışqanlığı və işinə olan sevgisi mentorunun diqqətini çəkirdi.

Və çox keçmədən elə təcrübə keçdiyi müəssisədə işə qəbul olunur. Bu gün Tamam artıq sevdiyi peşə üzrə çalışır. Gələcəkdə isə özünü daha da inkişaf etdirərək xaricdə işləmək və sahibkar olmaq onun əsas məqsədlərindəndir.

Tamam deyir:

“Dual peşə təhsili sayəsində illərlə arzuladığım işi əldə etdim. Mən inanıram ki, zəhmət və əzmlə hər bir xəyal gerçək olur. Mənim hekayəm də bunun bariz nümunəsidir.”