“Usta yanında şagirdlik nədir?”

“Usta yanında şagirdlik” “şagird” və “usta” münasibətləri əsasında qurulub. “Şagird” sözünün şifahi ədəbiyyatımızdakı arxaik ifadə forması olan şəyirdlik klassik təlim sistemində peşə tərbiyəsi metodunun adıdır. Orta əsr türkdilli mənbələrdə çıraq adlandırılan bu metodun yaranma tarixi qədim Misir və Mesopotamiya dövrünə qədər uzanır. Əsasən, uşağa əməyi sevdirmək və peşə öyrətmək mexanizmi olan bu qədim təlim forması daha sonra sənətin hər sahəsində tətbiq edilmişdir. Nəticədə qədim və orta əsrlər tariximizdə usta-çıraq və ya usta-şəyird adlandırılan xüsusi bir münasibət sistemi formalaşmışdır.

Usta yanında şagirdlik və təcrübə proqramları ümumiyyətlə, “təhsil və tədrisin bir hissəsi olub, ödənişli və ya ödənişsiz əsaslarla məhdud bir iş praktikası və ya peşə təcrübəsi qazanmaq üçün müntəzəm məşğulluğa keçidin asanlaşdırılmasıdır (ILO, 2014).

İşə əsaslanan öyrənmənin məqsədi peşəkar, sosial və şəxsi bacarıqları inkişaf etdirməkdir. Bunlar məşğulluq, şəxsiyyətin formalaşması və sosial inteqrasiya üçün vacib ilkin şərtlərdir. Bu metodun xüsusi güclü tərəfi praktiki bacarıq və səriştələrin real iş mühitində əldə edilməsindədir. İşə əsaslanan öyrənmə təkcə formal təhsil və təlim iştirakçılarını deyil, eyni zamanda işəgötürən müəssisənin işçilərini də əhatə edir.